Gunnar lék sinn 751. leik og Keflavík vann Hamar

„Ég man ekki sérstaklega eftir neinum leik nema helst leikjunum í Evrópukeppninni,“ sagði Gunnar Einarsson, sem varð leikjahæsti Keflvíkurliðsins í körfubolta í kvöld þegar Keflavík mætti Hamri í síðustu umferð Iceland Express deildarinnar í Toyota höllinni í kvöld. Lokatölur urðu 107-100 fyrir Keflavík.

Hamarsmenn stóðu í Keflvíkingum framan af en heimamenn náðu 12 stiga forskoti í lok þriðja leikhluta og bættu svo um betur í byrjun þess fjórða. Mestur varð munurinn 21 stig en Hamarsmenn minnkuðu muninn í lokin.

Urule Igbavboa hefur sprungið út í síðustu tveimur leikjum. Hann skoraði 19 stig og var með 75% skotnýingu inni í teig og á vítalínunni auk þess sem hann tók 11 fráköst. Draelon Burns skoraði 18, Hörður Axel 17 og Gunnar Einarsson var með 13 stig í 751. leiknum sínum með Keflavík.

Aðspurður um hvað væru skemmtilegustu leikirnir sagði Gunnar það án umhugsunar nágrannaslagina við Njarðvík en annað eftirminnilegt á ferlinum væri án efa þegar hann var kjörinn leikmaður úrslitakeppninnar vorið 2008 þegar Keflavík varð Íslandsmeistari.

KR varð deildarmeistari eftir sigur á Snæfelli í kvöld, Grindavík tapaði óvænt fyrir ÍR og Njarðvík vann FSu.

Á efri myndinni er Gunnar Einarsson með stjórnarmanninum Þorsteini Ragnarssyni og Margeiri Margeirssyni framkvæmdastjóra körfuknattleiksdeildar Keflavíkur og syni sínum, Einari. Á neðri myndinni er Gunnar að skora tvö af stigum sínum í leiknum í kvöld. VF-myndir/Páll Orri og Páll Ketils.