Gummi Steinars: „Hlökkum til að mæta þeim aftur!“

Eftirmálar knattspyrnuleiks Keflavikur og ÍA á Skipaskaga fyrir helgi hafa verið einhverjir þeir eftirminnilegustu síðustu ár og hörð skot fengið að fljúga á báða bóga. Nú hefur nokkuð hægst um í málinu, en óvíst er hvaða stefnu það mun taka í framhaldinu. Víkurfréttir tóku Guðmund Steinarsson, leikmann Keflavíkur, tali og spurðu hann út í núverandi stöðu málsins.

Er von til þess að þetta mál verði til lykta leitt á næstunni?
„Nú er boltinn hjá KSÍ sem er að reyna að fá niðurstöðu í þetta mál ásamt félögunum. Hver svo sem hún verður og hversu sáttir sem menn verða við hana. Umræðan hefur verið að snúast um að við þyrftum að biðjast afsökunar á okkar hegðun eftir leik og þannig hefur verið dregin athygli af markinu og það er mjög döpur umræða. Þeir eru að einblína á það sem gerðist eftir leik, en við erum að benda á hina ömurlegu framkomu þeirra inni á vellinum. Það skýrir okkar mál best með framkomu okkar utan vallar og innan að við fáum hvorki skömm í hattinn frá dómara né eftirlitsdómara leiksins. Enginn okkar fékk gult spjald fyrir mótmælin.“

En brugðust þið of hart við í framhaldi af markinu?
„Nei, það vissu allir inni á velinum hvað hann var að hugsa og hann vissi það best sjálfur. Mér fannst viðbrögð okkar eðlileg. Við hlaupum að honum og spyrjum hvern djöfulinn hann sé að gera. Það er líka hægt að sjá af myndum að hörðustu höggin sem Bjarni fær eru frá hans eigin mönnum þegar þeir eru að draga hann í burtu. Það var enginn Keflvíkingur sem fer á honum eftir það.“

Guðmundur þvertekur fyrir að Keflvíkingar hafi beitt nokkurn ofbeldi, innan vallar eða utan hans.
„Það sést á myndunum að það er verið að ýta mönnum tiil, en það er enginn sleginn eða kýldur eða sparkað í einhvern. Það var ekkert svoleiðis. Það hafa gerst verri atriði en þetta á Íslandi og víðar.“

Á þetta eftir að hafa varanleg áhrif á hvernig þessi mál verða afgreidd innan vallar?
„Jú, ég hugsa að knattspyrnuforystan og forráðamenn liðanna þurfi að setjast niður og fara yfir þessa háttvísifyrirmæli. Það kæmi mér ekki á óvart þó sömu reglur yrðu teknar hér upp og voru í Englandi, þar sem dómarinn ræður hvort leikur sé stöðvaður eða ekki. Það er kannski eðlilegast.“

ÍA og Keflavík hafa eldað grátt silfur saman síðustu ár, en þarf ekki að hreinsa loftið milli liðanna fyrir næsta leik svo ekki myndist þar stríðsástand?
„Nei, þetta er fínt að hafa þetta svona. Það má alveg vera smá kergja á milli þessara félaga og við hlökkum bara til að mæta þeim í 18. umferð, það er ef þeir þora að koma!“