Guðni og Rúnar fengu gullmerki KSÍ

Þau Margrét Lára Viðarsdóttir og Hermann Hreiðarsson voru í gær útnefnd knattspyrnumenn ársins 2007 af Knattspyrnusambandi Íslands við hátíðlegt tilefni í höfuðstöðvum KSÍ í Laugardal. Af sama tilefni voru þeir Rúnar Arnarson formaður KSD Keflavíkur og Guðni Kjartansson fyrrum fyrirliði og þjálfari Keflavíkur og íslenska landsliðsins sæmdir gullmerki KSÍ.

 

Gullmerki KSÍ fá þeir sem hafa unnið að knattspyrnuíþróttinni langvarandi og þýðingarmikil störf. Þá voru nokkrir einstaklingar sem starfa eða hafa starfað að knattspyrnunni í Keflavík sæmdir silfurmerki KSÍ. Þá hafa þessir aðilar unnið vel og dyggilega að eflingu knattspyrnuíþróttarinnar í áratug eða lengur.

 

Þeir frá Keflavík sem fengu silfurmerki KSÍ voru þeir Kári Gunnlaugsson, Gísli Jóhannsson, Ásbjörn Jónsson, Ragnar Örn Pétursson og Sigurður Friðjónsson.

 

Efri mynd: [email protected] - Rúnar Arnarson formaður KSD Keflavíkur.

 

Neðri Mynd: Hafliði Breiðfjörð, www.fotbolti.net – Gísli Hlynur Jóhannsson dómari tekur við silfurmerki sínu í höfuðstöðvum KSÍ. Með honum á myndinni er Geir Þorsteinsson formaður KSÍ.