Grindvíkingar úr leik!

Grindvíkingar töpuðu fyrir Snæfelli í Stykkishólmi í kvöld, 116-114 , og féllu þar með úr keppni í undanúrslitum Iceland Expressdeildar karla í körfuknattleik.

Snæfellingar byrjuðu betur, en Grindvíkingar náðu frumkvæðinu í öðrum leikhluta þar sem Adama Darboe fór á kostum og jókst munurinn upp í 49-62 í hálfleik.

Leikurinn einkenndist af mikilli baráttu í seinni hálfleik og þurfti oft og tíðum að ganga á milli manna. Gestirnir voru hins vegar sterkari framan af og stefndi allt í sigur Grindvíkinga en skotsýning Sigurðar Þorvaldssonar kom snæfelli aftur inn í leikinn og Hlynur Bæringson jafnaði leikinn fyrir lok venjulegs leiktíma, 106-106.

Leikurinn var æsispennandi í framlengingunni en Justin Shouse kom Snæfelli yfir þegar 11 sekúndur lifðu af leiknum.

Lokaskot leiksins frá Þorleifi Ólafssyni geigaði og því fór sem fór.