Grindvíkingar tapa í Eyjum

Grindvíkingar máttu sætta sig við 2-1 tap gegn ÍBV í 1. deild karla í knattspyrnu í dag. Leikurinn átti að fara fram í gær, laugardag, en var frestað sökum veðurs.

Grindvíkingar hefðu getað komist á topp deildarinnar með sigri og það leit ekki illa út fyrir þá tila ð byrja með því þeir komust yfir strax á 8. mínútu með glæsimarki Mounirs Ahandour.

Bretinn Ian Jeffs í liði Eyjamanna var Grindvíkingum hins vegar óþægur ljár í þúfu og skoraði tvö mörk, sitt hvoru megin við hálfleik, og tryggði ÍBV góðan heimasigur og áframhaldandi von um sæti í úrvalsdeild.

Grindvíkingar eru enn í 3. sæti, en eiga leik til góða á topplið Þróttar.

Mynd úr safni VF: Mounir Ahandour gerði mark Grindvíkinga í dag.