Grindvíkingar réðu ekki við Valssóknina í þriðja leikhluta
Valur tók fyrsta leikinn í kvöld og þar af leiðandi forystu í einvíginu við Grindavík um Íslandsmeistaratitil karla í körfuknattleik. Framan af allt í járnum en í þriðja leikhluta tókst Valsmönnum að byggja upp forystu sem Grindvíkingar náðu ekki að jafna.
Valur - Grindavík 89:79
(21:22 | 16:15 | 32:21 | 20:21)
Staðan eftir fyrsta leikhluta var 21:22 en í fyrstu tveimur leikhlutunum var munurinn sjaldan meiri en eitt, tvö stig.
Það voru Grindvíkingar sem leiddu mestallan fyrri hálfleik en undir lok annars leikhluta setti Valur niður þrist og jöfnuðu leikinn í 37:37.
Sókn Valsara setti í gírinn eftir hálfleikshressinguna og þótt Grindvíkingar hafi skorað 21 í þriðja leikhluta gerði Valur gott betur en það, eða 32 stig.
Grindvíkingar voru því ellefu stigum undir þegar fjórði leikhluti fór af stað (69:58) og heimamenn gáfu þeim ekki færi til að hleypa spennu í lokin.
Hjá Grindavík voru það Deandre Kane (37 stig) og Dedrick Basile (22 stig) sem drógu vagninn en aðrir sem komust á blað voru þeir Ólafur Ólafsson (9 stig), Daniel Mortensen (4 stig), Kristófer Gylfason (3 stig) og þeir Valur Orri Valsson og Julio de Asisse gerðu tvö stig hvor.
Sigurbjörn Daði Dagbjartsson, fréttamaður Víkurfrétta, ræddi við Jóhann Þór Ólafsson, þjálfara Grindavíkur, og Ólaf Ólafsson, leikmann og fyrirliða Grindvíkinga, eftir leik.
