Grindvíkingar færast neðar á töflunni

Grindavík fjarlægist umspilssæti í Lengjudeild karla í knattspyrnu eftir tap fyrir Selfossi í gær. Grindvíkingar eru komnir í áttunda sæti og ef þeir halda áfram á sömu vegferð gætu þeir hæglega blandað sér í fallbaráttuna.

Selfyssingar guldu afhroð í síðustu umferð þegar þeir töpuðu 9:0 fyrir Aftureldingu en þeir náðu að rífa sig upp fyrir leikinn í gær. Grindvíkingar hins vegar eru fastir í einhverri holu en andleysi og lítið sjálfstraust virðist vera að plaga liðið.

Fyrri hálfleikur var tiltölulega jafn en Grindvíkingar voru meira með boltann og Selfoss hélt sig meira til baka. Bæði lið fengu færi en Selfyssingar voru þó líklegri til að skora.

Eftir að Selfoss náði forystu í seinni hálfleik (49') tvíefldust þeir og náðu undirtökunum í leiknum. Grindavík náði ekki að ógna og Selfoss gerði endanlega út um leikinn skömmu fyrir leikslok (87').

Grindavík mæti til Njarðvíkur á laugardaginn og má búast við hörkuleik en hvorugu liði hefur gengið sem skildi í sumar. Þetta er leikurinn sem gæti snúið við gengi beggja liða – nú er að duga eða drepast.