Grindvíkingar fá að góða hvíld meðan hin liðin mætast í oddaleik
Grindvíkingar voru fyrsta liðið til að tryggja sér sæti í 4-liða úrslitum Epson-deildarinnar í körfu þegar þeir sigruðu Tindastól á sunnudag 83:63 á heimavelli. Friðrik Ingi Rúnarsson þjálfari Grindvíkinga sagði í samtali við vf.is að hann hefði í raun ekki búist við því að vinna svona sannfærandi..„Þó svo sigrarnir hafi litið út fyrir að vera auðveldir tók það geysimikla orku og þrek frá okkur að landa þessum sigrum. Það var mikil vinna lögð í það að stoppa þeirra helstu vopn sem eru stóru mennirnir. Varnaleikurinn var gíðarlega góður þó sér í lagi í seinni leiknum en þetta var besti varnaleikur okkar í vetur. Hann braut þá niður og því var þetta nokkuð þægilegt þegar upp var staðið“.
Ertu ekki ánægður með að fá hvíldina?
„Jú auðvitað er gott að fá smá hvíld inn á milli en hún má þó ekki vera of mikil. Þegar komið er í úrslitakeppni eru stutt á milli leikja og menn vita að hverju þeir ganga. Við munum þó njóta þess í einn til tvo daga.“
Eru þið að smella betur saman núna en áður?
„Já það má segja það. Þetta hefur verið erfiður vetur en við höfum hins vegar ekkert verið að kvarta og kveina þó svo ýmsir lykilmenn hafi lent í meiðslum. Auðvitað er talsvert erfitt að spila þegar menn á borð við Pétur Guðmundsson, Nökkva Jónsson og Helga Guðfinnsson eru meiddir. Við vorum einnig án kana til að byrja með og því er ósanngjarnt að dæma liðið út frá því en við höfum verið að spila betur og betur með hverjum leiknum. Það skilaði sér vel þegar við breyttum um kana og þá fór flæðið í liðinu að ganga betur og við byrjuðum að spila betur“.
Er einhver óskamótherji í 4-liða úrslitum?
„Nei í raun ekki en við gerum þó ráð fyrir að mæta Keflvíkingum og í hinum leiknum mætast Njarðvík og KR. Ef við mætum Kef. þá munu þetta koma til með að verða skemmtilegir leikir eins og alltaf þegar þessi lið spila“.
Eigi þið möguleika á titlinum?
„Já við eigum góða möguleika á honum svo lengi sem við spilum af krafti og hungrið er til staðar en þá eru okkur allir vegir færir“.
