Grindavík valtaði yfir Selfoss

Grindvíkingar unnu góðan 5-0 sigur á Selfyssingum í gærkvöldi í 1. deild karla en leikið var á Grindavíkurvelli. Eftir leik gærkvöldsins eru Grindvíkingar í 5. sæti 1. deildar eftir 15 leiki spilaða en um var að ræða 1. leik 15. umferðar.

Leikurinn var ekki nema 9 mínútna gamall þegar Björn Berg Bryde skoraði úr vítaspyrnu. Alex Freyr Hilmarsson skoraði svo annað mark heimamanna á 15. mínútu og ljóst í hvað stefndi. 

Hákon Ívar Ólafsson skoraði svo tvö mörk sitt hvorum megin við hálfleikinn og það var svo Alex Freyr sem að skoraði sitt annað mark og rak endahnútinn í stórsigur heimamanna. Lokatölur urðu því 5-0. 

Sem fyrr segir eru Grindvíkingar í 5. sæti 1. deildar karla en hafa leikið einum leik meira en liðin í kringum þá en næstu lið fyrir ofan í töflunni, Fjarðarbyggð og Þór Akureyri, mætast einmitt í kvöld þar sem að jafntefli yrðu heppilegustu úrslitin fyrir Grindvíkinga sem freista þess að vinna sig upp töfluna á lokaspretti mótsins í von um sæti í Pepsí deildinni að ári.