Grindavík heimsækir Fjölni í kvöld
Tveir leikir fara fram í Iceland Express deild kvenna í körfuknattleik í kvöld þegar Fjölnir tekur á móti Grindavík og Hamar fær Hauka í heimsókn í Hveragerði. Báðir leikir kvöldsins hefjast kl. 19:15. Með sigri í kvöld getur Grindavík jafnað Keflavík á toppi deildarinnar en fyrir leiki kvöldsins hefur Keflavík 22 stig en KR og Grindavík hafa bæði 20 stig í 2.-3. sæti deildarinnar.
Fjölniskonur sitja á botni deildarinnar með 2 stig en í gærkvöldi barst þeim liðsauki í Bryndísi Gunnlaugsdóttur sem var stigahæsti leikmaður Ármanns í 1. deild kvenna. Óvíst er hvort hún verði lögleg í leiknum í kvöld. Fjölnir mátti sætta sig við stóran ósigur gegn Keflavík í sínum síðasta deildarleik en Grindavík lagði Hamar örugglega í Röstinni í sínum síðasta leik.
VF-Mynd/ Úr safni - Ólöf Helga og félagar í Grindavík mæta Fjölni í Grafarvoginum í kvöld.
