Grindavík auðveldlega áfram í Mjólkurbikar kvenna – Njarðvík úr leik
Dröfn skoraði fimm mörk
Fyrsta umferð Mjólkurbikars kvenna í knattspyrnu hófst um helgina. Grindavík og Njarðvík léku sína leiki í gær þar sem Grindavík vann stórsigur á Smára en Njarðvík tapaði stórt fyrir ÍH.
Smári - Grindavík 0:9
Eins og tölurnar gefa til kynna var sigur Grindvíkinga öruggur. Ása Björg Einarsdóttir skoraði fyrsta markið og kom Grindavík yfir í byrjun leiks (2').
Næsta mark skoraði Sigriður Emma F. Jónsdóttir (19') og Dröfn Einarsdóttir skoraði tvö fyrir leikhlé (32' og 36').
Grindavík skoraði þrjú mörk með tveggja mínútna millibili í upphafi seinni hálfleiks. Dröfn fullkomnaði þrennuna (46'), og Aubrey Goodwill bætti við sjötta marki Grindavíkur (48') og fyrirliðinn Una Rós skoraði það sjöunda (50').
Það var svo Dröfn Einarsdóttir sem fullkomnaði frábæran leik sinn með tveimur mörkum til viðbótar (61' og 74'), fjórða og fimmta mark hennar í leiknum.
Njarðvík - ÍH 0:10
Njarðvík tefldi fram liði í meistaraflokki kvenna í annað sinn og mætti ÍH í gær. Njarðvíkingar eru að móta kvennaliðið og væntingar standa til þess að Njarðvík spili í deildarkeppni KSÍ á næsta tímabili.
Eins og sést var á brattann að sækja fyrir Njarðvík sem lenti undir á 6. mínútu. ÍH, sem hefur að skipa mörgum upprennandi leikmönnum úr FH, skoraði fimm mörk í hvorum hálfleik án þess að Njarðvíkingar næðu að svara en ungt lið Njarðvíkur setur leikinn í reynslubankann og verður gaman að sjá hvernig framhaldið á meistaraflokknum verður.
