Grindavík að hlið Keflavíkur á toppi deildarinnar

Grindavík komst í kvöld upp að hlið Keflavíkur á toppi Iceland Express deildar kvenna með 68-79 útisigri gegn Fjölni í Grafarvogi. Tiffany Robertson var atkvæðamest í liði Grindavíkur með 23 stig og 9 fráköst en Slavica var stigahæst hjá Fjölni með 26 stig, 11 fráköst, 5 varin skot og 6 stoðsendingar. Grindavík hafði undirtökin allan leikinn en náðu aldrei að hrista Fjölni langt frá sér. Fjölnir er enn á botni deildarinnar með 2 stig.

 

Grindavík leiddi 16-21 að loknum fyrsta leikhluta og juku svo muninn í 16-30 í upphafi annars leikhluta. Fjölnir skoraði sín fyrstu stig í öðrum leikhluta þegar 5.30 mín. voru til hálfleiks en þá setti Slavica niður þrist fyrir Fjölni og staðan 19-30. Liðin gengu svo til leikhlés í stöðunni 25-42 Grindavík í vil.

 

Tiffany Robertson var með 15 stig í hálfleik fyrir Grindavík en Slavica 11 hjá Fjölni.

 

Fjölniskonur gerðu vel í þriðja leikhluta og náðu að minnka muninn í 10 stig, 33-43, en þá tóku Grindvíkingar á rás að nýju og breyttu stöðunni í 48-63 og þannig stóðu leikar fyrir fjórða og síðasta leikhluta.

 

Sama hvað Fjölniskonur reyndu og hversu nálægt þær komust þá hertu Grindvíkingar ávallt róðurinn svo óhætt er að segja að sigur Grindavíkur hafi verið í nokkuð öruggum höndum í kvöld.

 

Með sigrinum eru Keflavík og Grindavík jöfn á toppi Iceland Express deildar kvenna með 22 stig en nýliðar KR eiga leik til góða og geta þá jafnað liðin á toppi deildarinnar með sigri.

 

Grindvíkingurinn Bryndís Gunnlaugsdóttir lék í kvöld sinn fyrsta leik fyrir Fjölni í Iceland Express deildinni en hún skipti í gær til Fjölnis úr 1. deildarliði Ármanns. Hún mátti því þola ósigur gegn gömlu vinkonum sínum í kvöld í þessum fyrsta leik sínum fyrir Grafarvogskonur.

 

Tölfræði leiksins

 

Gangur leiksins:

 

16-21, 19-30, 25-42, 33-43, 45-61, 48-63, 56-66, 60-70, 68-79.

 

VF-Mynd/ [email protected] – Tiffany Robertson var fyrirferðamikil í liði Grindavíkur í kvöld.