Grétar íhugar að hætta í boltanum

Framherjinn Grétar Ólafur Hjartarsson sem leikur með Reyni Sandgerði íhugar þessa dagana hvort hann ætli að halda knattspyrnuiðkun áfram. Hann sagði í samtali við VF að hann lægi undir feldi og væri ekkert farinn að æfa. Undirbúningstímabilið á Íslandi er með lengra móti og Grétar segir að eftir því sem árin færist yfir þá verði fríið yfirleitt lengra hjá honum.

Atli Eðvaldsson tók við þjálfun hjá Reyni í haust og Grétar viðurkennir að það sé freistandi að taka eitt tímabil til viðbótar í boltanum. „Eins og staðan er núna þá nenni ég þessu ekki. En þegar grasið fer að grænka þá breytist það kannski.“ Grétar segist vera í góðu ástandi en í gegnum tíðina hefur hann verið nokkuð óheppinn með meiðsli. Þannig að spurningin er einfaldlega hvort löngunin sé til staðar hjá kappanum.

Grétar lék vel með Reynismönnum í fyrra og hann segir gaman að vera kominn á heimaslóðir. Hinn 35 ára gamli framherji, sem er uppalinn í Sandgerði lék síðast með Reyni sumarið 1997, en hefur síðan verið á mála hjá Stirling í Skotlandi, Grindavík, KR og síðast Keflavík.

Grétar lék 23 leik með Reyni í fyrra og skoraði í þeim 12 mörk. Alls á Grétar að baki 200 leiki á Íslandi þar sem hann hefur skorað 85 mörk. Einnig á Grétar tvo landsleiki með undir 21 árs liði Íslands og einn æfingaleik með A-landsliðinu árið 2002 gegn Brasilíu.