Góður útisigur hjá Grindavík

Grindavík vann góðan útisigur, 0-2, á HK á Kópavogsvelli í kvöld í 20. umferð Landsbankadeildar karla. Aljosa Gluhovic skoraði fyrra mark Grindavíkur á 10. mínútu leiksins eftir að Scott Ramsey hafði komist í gegnum vörn HK-inga. Gluhovic var á réttum stað þegar boltinn hrökk til hans og skoraði sitt fyrsta mark fyrir Grindvíkinga í Landsbankadeildinni.

HK sótti mun meira í leiknum en Grindvíkingar lágu aftarlega á vellinum og beittu skyndisóknum. Ein þessara skyndisókna gekk svo upp þegar Gilles Mbang Ondo komst einn í gegn og skoraði með góðu skoti. Staðan var 0-2 fyrir Grindvíkinga í hálfleik.

Það sama var upp á teningnum í seinni hálfleik því HK var meira með boltann, en Grindvíkingar sköpuðu sér fleiri færi. Ekki voru fleiri mörk skoruð í leiknum og höfðu Grindvíkingar með sér öll þrjú stigin.

Grindvíkingar eru því með 27 stig eftir 20 umferðir í 7. sæti deildarinnar. Þeir sigla lygnan sjó í deildinni því þeir eru sloppnir við fall og eru ekki í baráttunni um Evrópusæti. Á sunnudaginn mæta þeir ÍA á Grindavíkurvelli kl. 16:00, en ÍA féll úr Landsbankadeildinni í kvöld eftir 0-0 jafntefli við KR.

VF-MYND/JJK: Aljosa Gluhovic skoraði sitt fyrsta mark í Landsbankadeild karla í kvöld.