Góður útisigur Grindavíkur

Grindvíkingar styrktu stöðu sína í botnbaráttu Landsbankadeildarinnar með sigri á Fylki í Árbænum í kvöld, 0-1.

 

Eina mark leiksins skoraði Alexander Veigar Þórarinsson á 17. mínútu, en þetta fyrsta mark Alexanders í efstu deild verð til eftir frábæran undirbúing Scott Ramsey. Skotinn fljúgandi lék á Val Fannar Gíslason, komst inn í teig og skaut knettinum í stöng þaðan sem Alexander afgreiddi hann í netið.

 

Þetta reyndist eina mark leiksins þó Fylkismenn hafi gert nokkrar atlögur að marki gestanna og m.a. átt skot í stöng í seinni hálfleik.

 

Grindvíkingar eru nú í 9. sæti af 12 í deildinni, en þeir komust upp fyrir Fylkismenn, á markamun að vísu, með þessum sigri og hafa verið að sækja verulega í sig veðrið að undanförnu.

 

Fróðlegt verður að sjá hvernig þeim mun ganga eftir að Grétar Ólafur Hjartarson og Gilles Mbang Ondo fá leikheimild með liðinu þann 15. júlí.