Glæstur árangur hjá Jóhanni í Argentínu

Borðtenniskappinn Jóhann Rúnar Kristjánsson er vongóður um að hafa tryggt sér sæti á Ólympíumóti fatlaðra í Peking í Kína á næsta ári. Jóhann tók þátt í móti sem fram fór í Buenos Aires í Argentínu um helgina og landaði þar fjöldanum af styrkleikastigum.

 

Jóhann segir í samtali við Morgunblaðið í dag að hann sé mjög ánægður með árangurinn og að hann telji að frammistaðan hans í mótinu hafi tryggt honum farseðilinn til Kína.

 

Jóhann hafnaði í 4. sæti í sínum flokki og í liðakeppni endaði hann í 3. sæti þar sem meðspilari hans kom frá Brasilíu.

 

Hægt er að safna stigum fyrir Ólympíumótið í Peking fram að áramótum og vonast Jóhann til þess að frammistaða hans í Argentínu hafi dugað. Ef svo er ekki þá er eitt mót í Chicago í Bandaríkjunum daganan 27.-31 desember og vonast Jóhann til þess að sleppa við þá för.

 

Heimild: Morgunblaðið í dag, www.mbl.is

 

VF-Mynd/ Úr safni - Jóhann Rúnar Kristjánsson