Glæsilegt kvennamót í Grindavík

Blue Lagoon open, eitt glæsilegasta kvennamót ársins í golfi, verður haldið á Húsatóftavelli í Grindavík laugardaginn 22. september.

Bláa Lónið er styrktaraðili allrar golfklúbbana á Suðurnesjum og leggur til glæsilega vinninga til mótsins.  Á meðal vinninga eru Blue Lagoon snyrtivörur, dekur og matur. Nú þegar eru hátt í 70 konur skráðar í mótið.

Halldór Einir Smárason, varaformaður Golfklúbbs Grindavíkur, sagði að gott samstarf við öfluga styrktaraðila eins og Bláa Lónið væri ómetanlegt fyrir starfsemi golfklúbbana á svæðinu. „Samstarfið gerir okkur m.a. kleift að halda góð mót sem styðja við starfsemi klúbbsins,“ segir Halldór.

Bláa Lónið er styrktaraðili allra golfklúbbanna á Suðurnesjum
Magnea Guðmundsdóttir, kynningarstjóri Bláa Lónsins, segir að samstarfið við klúbbana hér á Suðurnesjum hafi verið afar ánægjulegt. „Okkar framlag felst m.a. í því að leggja til vinninga fyrir hin ýmsu mót sem klúbbarnir halda.  Öflugt starf golfklúbbanna er mikilvægt fyrir samfélagið í heild sinni og þá er barna- og unglingastarfið ómetanlegt.“