Fyrsti sigur Karenar kom með stæl
Fór holu í höggi og sigraði á Borgunarmótinu á Eimskipsmótaröðinni
Karen Guðnadóttir úr Golfklúbbi Suðurnesja sigraði á Borgunarmótinu á Hvaleyrarvelli sem lauk í gær en mótið er hluti af Eimskipsmótaröðinni. Karen gerði sér lítið fyrir og fór holu í höggi á þriðja hring á 6. braut vallarins sem er 131 metri.
Karen hóf þriðja keppnisdaginn sex höggum á eftir klúbbfélaga sínum úr GS, Kingu Korpak, sem hafði leikið magnað golf fyrstu tvo dagana. Kinga náði sér hins vegar ekki á strik á þriðja degi og endaði í 3. sæti mótsins en hún er aðeins 13 ára gömul Karen lék hins vegar mjög vel og tryggði sér sigur í fyrsta sinn á mótaröð þeirra bestu.
Karen stóð sig einnig vel á Íslandsmótinu í höggleik sem leikið var Hvaleyrinni helgina á undan og varð þar í 4. sæti.
Karen einbeitt á teig á Hvaleyrarvelli. Kinga er á neðri myndinni en hún endaði í 3. sæti.
