Fyrsti sigur Grindvíkinga kom í bragðdaufum grannaslag

Grindvíkingar unnu sinn fyrsta sigur í sumar þegar þeir slógu Keflvíkinga út í bikarkeppni KSÍ í kvöld með 0-1 sigri á Nettóvellinum í Keflavík. Leikurinn var ekki mikið fyrir augað og á löngum köflum mjög bragðdaufur.

Það var Alex Feyr Hilmarsson sem skoraði mark Grindvíkinga eftir rétt rúmlega hálftíma leik en skömmu áður höfðu Grindvíkingar átt skot í slá og Alexander Magnússon átti lúmskt skot í utanverða stöngina.

Keflvíkingar áttu líka sín færi í fyrri hálfleik en Óskar Pétursson markvörður gestanna varð vel í nokkur skipti og bjargaði marki.Grindvíkingar náðu að loka vel á spil Keflvíkinga og varnarleikur þeirra var mjög þéttur þar sem fimm menn skipuðu öftustu varnarlínuna.

Í Seinni hálfleik gerðist lítið markvert og Grindvíkingar fögnuðu innilega í leikslok enda hefur liðið ekki haldið hreinu það sem af er sumri og er þetta fyrsti sigur liðsins.

Arnór Ingvi Traustason hjá Keflavík var valinn í U-21 lið Íslands í dag. Hér er hann í háloftunum.

Alex Freyr Hilmarsson fagnar sigurmarki sínu í leiknum.

Óskar Pétursson ver glæsilega frá Jóhanni B. Guðmundssyni.

Jóhann Benediktsson á ferðinni upp kantinn.

Sigurbergur Elísson átti nokkur færi eftir að hann kom inná.





Einari Orra Einarrsyni og Marko Valdimar Stefánssyni sinnaðist í leiknum og uppskáru þeir báðir spjald fyrir vikið.



Glaðir Grindvíkingar í leikslok.

Efsta mynd: Alex Freyr skorar með fínu vinstri fótar skoti.

VF Myndir: Eyþór Sæmundsson og Páll Orri Pálsson.