Fyrsti landsleikurinn í Reykjaneshöll
- Stelpurnar í U19 leika gegn A landsliði Færeyja
Fyrsti landsleikurinn sem fram fer í Reykjaneshöll hófst núna kl. 16:00. Þar taka stelpurnar í U19 landsliði Íslands á móti A landsliði Færeyja. Reykjaneshöll er 15 ára um þessar mundir og því tímabært að þar færi fram landsleikur.
Stelpurnar í U19 munu leika tvo vináttulandsleiki gegn A landsliði Færeyja en leikirnir fara fram á föstudag og sunnudag. Seinni leikurinn fer fram í Akraneshöllinni, sunnudaginn 22. febrúar kl. 19:00.
Fyrir þá sem ekki komast til að berja stelpurnar augum þá verða leikirnir í beinni útsendingu á vefsíðunni Sport TV.
Þessir leikir eru liður í undirbúningi fyrir keppni í milliriðli EM U19 kvenna en Ísland leikur í riðli með Frökkum, Rússum og Rúmenum og verður leikið í Frakklandi, 4. - 9. apríl. Þessir leikir eru líka mikilvægir færeyska liðinu í undirbúningi sínum fyrir forkeppni EM en þar leikur liðið gegn Andorra, Georgíu og Möltu um laust sæti í undankeppni EM.
