Fyrsti kossinn átti sér stað í fyrsta félagsheimili Þróttar

Val á íþróttamanni ársins hjá Þrótti Vogum fór fram 1. febrúar síðastliðinn og við það tilefni stóð einn harðasti stuðningsmaður félagsins, Gunnar Júlíus Helgason, upp á samkomunni og kvað sér hljóðs.

Það var falleg stund þegar Gunnar bað um orðið og afhenti Þrótti veglega peningagjöf í minningu ömmu sinnar og afa, þeirra Guðrúnar Lovísu Magnúsdóttur og Guðmundar Björgvins Jónssonar.

Fram kom í ræðu Gunnars að þau hefðu verið borin og barnfædd í Vogunum og hefðu tekið virkan þátt í samfélaginu alla sína tíð. Þau höfðu meðal annars verið meðal stofnenda Ungmennafélagsins Þróttar árið 1932. Þau fylgdust vel með starfsemi félagsins, voru dugleg að mæta á kappleiki og voru virkir þátttakendur í uppbyggingu félagsins.

Það var vel við hæfi að fyrsti kossinn þeirra átti sér stað á dansleik ungmennafélagsins í fyrsta félagsheimili þess á Vatnsleysuströnd.