Fyrsta tap Keflvíkinga í sumar

Keflvíkingar töpuðu fyrir KR-ingum á heimavelli 0-1 í kvöld í 5. umferð Símadeildar karla í knattspyrnu. Mark KR-inga kom á 28 mínutu, en það var Sigurður Ragnar Eyjólfsson sem skoraði það. Keflvíkingar sóttu án afláts í síðari hálfleik en uppskáru þó ekki laun erfiðisins enda var þetta ekki þeirra dagur fyrir framan markið þar sem þeir klúðruðu hverju færinu á fætur öðru. Leikurinn byrjaði með látum og strax á 9. mínútu áttu KR-ingar sláarskot. Gestirnir sóttu mikið næstu mínútur og voru oft mjög nálægt því að skora. Á 25. mínútu fengu Keflvíkingar eina færi sitt í fyrri hálfleik þegar Magnús Þorsteinsson sendi knöttinn inn á teig ætlaðan Guðmundi Steinarssyni en Kristján Finnbogason markmaður KR var fyrri til og kýldi boltan burt en lenti svo á Guðmundi sem lá eftir í grasinu.

KR-ingar héldu áfram að sækja og á 28. mínútu skoraði Sigurður Ragnar Eyjólfsson mark fyrir KR með glæsilegu skoti fyrir utan teig eftir hroðaleg mistök Ragnars Steinarssonar sem gaf boltann beint í fætur Sigurðar. Þannig var staðan í hálfleik en óhætt er að segja að Keflvíkingar hafi vægast sakt verið arfaslakir í fyrri hálfleik og í raun stálheppnir að vera einungis 1-0 undir.

Nýtt Keflavíkurlið mætti til leiks í síðari hálfleik og þar má helstan nefna Adolf Sveinsson sem kom inná sem varamaður í hálfleik. Heimamenn hófu að sækja mun meira og með Adolf í broddi fylkinga áttu þeir hverja sóknina á fætur annarri á meðan ekkert gekk hjá KR.
Keflvíkingar fengu hvert dauðafærið á fætur öðru þar sem m.a. þrír leikmenn liðsins hittu ekki boltann í upplögðu færi og Magnús Þorsteinsson klikkaði úr opnu skoti eftir sendingu frá Þórarini Kristjánssyni á 69. mínútu. Síðasta færi Keflvíkinga kom á 86. mínútu þegar boltinn barst inn á teig frá Jónasi Sævarssyni en á einhvern óskiljanlegan hátt tókst þeim ekki að skora og jafna leikinn. Í blálokin meiddist Guðmundur Steinarsson á höfði eð háls og fór hann burt með sjúkrabíl til frekari skoðunar

Adolf Sveinsson á hrós skilið fyrir frábæra baráttu í leiknum og var hann besti leikmaður vallarins ásamt Kristjáni Jóhannssyni sem spilaði feikna vel á miðjunni en fór meiddur af leikvelli þegar um 10 mínútur voru eftir. Adolf sýndi í leiknum að það var vitleysa að taka hann úr byrjunarliðinu enda verður það að teljast nokkuð skrítið að liðinu hafi verið breytt þar sem liðið var í efsta sæti deildarinnar fyrir umferðina, búnir að spila vel og ekki tapað leik. Haraldur Guðmundsson og Zoran Ljubicic áttu einnig ágætan leik í vörn Keflvíkinga.
Keflvíkingar eru því enn með 8 stig í deildinni í 2. - 5. sæti.

VF-maður leiksins: Kristján Jóhannsson, spilaði vel á miðjunni og átti fjölmargar vel heppnaðar sendingar.
Tilþrif leiksins: Mark Sigurðar Ragnars var glæsilegt.
Dómarinn: Ágætur þegar líða tók á leikinn en var frekar slakur í fyrri hálfleik.