Fyrsta knattspyrnukonan til að skrifa undir samning við Njarðvík

María Rán Ágústsdóttir hefur skrifað undir samning við knattspyrnudeild Njarðvíkur og er hún á sama tíma fyrsta knattspyrnukonan sem félagið semur við.

„María Rán er sextán ára, uppalin í Njarðvík og hefur verið mjög mikilvægur hlekkur og fyrirmynd í uppgangi kvennaboltans í yngri flokkum í Njarðvíkur,“ segir á Facebook-síðu knattspyrnudeildarinnar. „Á örfáum árum hefur iðkendafjöldi hjá stelpum í félaginu farið úr örfáum í 100 og ennþá er að fjölga.“

Þetta eru gleðifréttir fyrir Njarðvíkinga og vonandi er María Rán sú fyrsta af mörgum sem gera samning við knattspyrnudeildina.