Friðrik Hreinsson: Þurfum að hægja á leiknum

Flestir ef ekki allir hafa spáð því að rimma Njarðvíkur og Hamars/Selfoss verði algjör einstefna Íslandsmeistaranna og segja margir að Njarðvík taki einvígið 2-0. Friðrik Hreinsson, helsta þriggja stiga skytta Hamars/Selfoss segir að staða liðanna eftir deildarkeppnina gefi það til kynna að H/S eigi ekki mikinn séns en bætir því við að þeir geti unnið hvaða lið sem er á heimavelli.

 

,,Við eigum góðan séns í þessari nýju keppni sem úrslitakeppnin er. Lið okkar breyttist mikið þegar Byrd kom í raðir okkar. Tapleikurinn heima gegn Njarðvík í deildinni fólst í tveimur eða þremur afdrifaríkum mistökum í lokin sem komu okkur í koll,” sagði Friðrik og var engan bilbug á honum að finna.

 

Njarðvíkingar hafa haft vörnina að aðalsmerki undanfarið enda hafa þeir unnið síðustu 15 deildarleiki sína í röð. ,,Þeir eru að spila gríðarlega sterka vörn og það hefur verið þeirra sterka hlið í vetur en svo eru Brenton og Jeb einnig erfiðir í sókninni. Við þurfum að hægja á leiknum í kvöld og spila okkar bolta, koma tilbúnir og leika hörkuvörn á móti Njarðvíkingum,” sagði Friðrik.

 

Mynd: Friðrik í leik gegn ÍR í bikarúrslitunum í febrúar.

 

[email protected]