Freyja fitnessdrottning fer á heimsmeistaramót

Freyja Sigurðardóttir mun taka þátt í heimsmeistarmótinu í fitness en það verður haldið í Brasilíu 26.-27. október. Sparisjóðurinn í Keflavík hefur gert styrktarsamning við Freyju vegna þátttöku í mótum innanlands sem utan og var skrifað undir samning þess efnis fyrir helgi.

Freyja æfir tvisvar á dag í Perlunni en reynir að taka einn dag í hvíld í viku. „Ég er búin að vera í mjög ströngu lyftinga- og matarprógrammi í tvo mánuði. Svona undirbúningi fylgir mikið álag en ég er líka í skóla og með fólk í einkaþjálfun, auk þess að æfa svona mikið sjálf. Ég er yfirleitt mætt upp í Perlu upp úr hálf sex á morgnana og kem heim á kvöldin um kl. níu. Þá tekur heimalærdómurinn við fyrir skólann“, segir Freyja en að heimsmeistaramótinu loknu tekur við undirbúningur fyrir bikarmót fitness sem haldið verður í Keflavík 24. nóvember nk.
„Ég stefni á að komast í 15 manna úrslit á heimsmeistaramótinu sem ég tel raunhæft, þar sem keppinautar mínir eru flestar atvinnumenn í íþróttinni og gera því ekkert annað æfa“, segir Freyja og lætur engan bilbug á sér finna.