Fóru holu í höggi í Skotlandi

Tveir félagar í Golfklúbbi Suðurnesja, þeir Steinar Sigtryggsson og Jón Björn Sigtryggsson fóru holu í höggi í golfferð í St. Andrews í Skotlandi í sl. viku.
Jón Björn var á undan að ná draumahögginu á Kinross golfvellinum ekki langt utan Glasgow en það var á fyrsta degi í árlegri vorferð sextán GS kylfinga. Jón Björn gerði þetta á 17. holu sem er 135 metra löng og notaði járnkylfu nr. 8. „Holan var aðeins upp í móti og ég hitti boltann mjög vel. Við sáum að hann lenti nálægt holunni. Einn úr mínu holli, Þorsteinn Sigurðsson, hljóp af stað upp á hæð, sagði hafa heyrt smell og staðfesti að boltinn væri í holu. Hann hljóp svo til baka og sló sjálfur nærri því í holuna móður og másandi“, sagði Jón Björn um atvikið.
Mikil gleði ríkti í herbúðum Suðurnesjakylfinga sem fara á hverju ári til Bretlands til að „hita upp“
fyrir komandi golfsumar. Ekki minnkaði gleðin fjórum dögum síðar en þá fór Steinar Sigtryggsson holu í höggi á 3. holu á Dukes golfvellinum, einum af fimm St. Andrews golfvallanna. Hann notaði 7. járn og holan var 130 metrar. „Þetta var stórkostlegt. Maður er búinn að reyna þetta í 21 ár. Nú er maður loksins kominn í klúbb klúbbanna (Einherja)“, sagði olíukóngur Suðurnesja. Tveir dögum eftir þetta atvik munaði litlu hjá þremur öðrum svo það er óhætt að segja að GS kylfingar hafi verið í stuði í þessari ferð.