Fjórða tap Keflavíkur
töpuðu 1-2 fyrir Fram á Nettó vellinum. Misstu mann útaf með rautt spjald í þriðja skipti í sumar.
Keflvíkingar máttu þola fjórða tapið í sex leikjum í Pepsi-deildinni í knattspyrnu þegar þeir töpuðu gegn Fram á Nettó-vellinum í Keflavík í kvöld. Lokatölur 1:2 fyrir gestina.
Keflvíkingar voru miklu betri í fyrri hálfleik og áttu þá nokkur dauðafæri, m.a. sláarskot frá fyrirliðanum Haraldi Frey Guðmundssyni en inn vildi boltinn ekki. Á 41. mínútu urðu Keflvíkingar fyrir áfalli þegar Magnús Þórir Matthíasson sem hafði átt mjög góðan leik fékk að líta rauða spjaldið fyrir að hrinda varnarmanni Fram. Tveimur mínútum fengu heimamenn mark í andlitið, algerlega gegn gangi leiksins þegar Hólmbert Friðjónsson skoraði fyrir Safamýrarliðið úr Reykjavík. Þess má geta að afi og nafni hans Hólmbert Friðjónsson þjálfaði Keflavík þegar liðið varð Íslandsmeistari 1969.
Steven Lennon skoraði annað mark Fram í upphafi seinni hálfleiks en afmælisbarn dagsins, Sigurbergur Elísson minnkaði muninn fyrir Keflavík þegar hann skoraði laglegt mark á 67. mínútu. Fleiri urðu mörkin ekki á Nettó vellinum.
Það vakti athygli að auk rauða spjaldsins sem Magnús Þórir fékk fengu fimm aðrir leikmenn Keflavíkur gula spjaldið en enginn Framari.
Næsti leikur Keflavíkur verður í Garðabænum gegn Stjörnunni.
Frans Elvarsson átti ágætan leik með Keflavík í kvöld. Zoran var ekki glaður í bragði eftir leikinn í kvöld.
