Fjölskyldumót í vetrarlok

Laugardaginn 23. apríl var haldið fjölskyldumót á vegum Badmintondeildar Keflavíkur, þar sem foreldrar eða eldri systkini mættu með börnunum. Leikinn var tvíliðaleikur, þátttaka var mjög góð og skemmtu allir sér mjög vel. Mót þetta var lokakafli vetrarstarfsins, en að því loknu fóru allir niður í K-hús þar sem veitt voru verðlaun, og smáveitingar.

Stefnt er að því að hefja starf aftur 8. ágúst en það verður auglýst þegar nær dregur.
Búið er að ráða þjálfara til deildarinnar og heitir hann Skúli Sigurðsson og útskrifast frá Íþróttakennara skólanum núna í vor. Skúli, sem er ráðinn til deildarinnar til þriggja ára, hóf þó störf í febrúar og mun sjá að mestu leyti um alla þjálfun. Vona forráðamenn deildarinnar að þetta verði til að auka áhuga almennings á að æfa badminton.

Þá vill stjórnin þakka iðkendum og aðstandendum þeirra svo og velunnurum fyrir veturinn og vonast til að sjá sem flesta að sumarfríi loknu.