Fer eftir því hvað skrokkurinn leyfir

Helgi Hólm keppti á Evrópumeistaramóti í frjálsum íþróttum sem fram fór í Gent í Belgíu dagana 16. til 18. mars. Helgi keppti í hástökki og stökk 1,35 metra sem er nýtt Íslandsmet í flokki 70 ára og eldri. Hann fór í tilefni af afmæli sínu en Helgi varð sjötugur 18. mars, sama dag og hann hóf keppni í mótinu.

„Ég hef æft frjálsar íþróttir alveg frá því ég var 15 ára gamall. Æfði alltaf með ÍR þegar ég var unglingur og keppti einnig með landsliðinu hér og þar í heiminum,“ sagði Helgi. Síðustu 20 árin hefur Helgi alltaf reynt að vera með á Íslandsmótunum hérna heima en keppt er bæði innan- og utanhúss á hverju ári. „Stundum keppi ég í hlaupum, stökkum, eða jafnvel köstum. Það fer bara eftir því hvað skrokkurinn leyfir hverju sinni.“

Þetta er í annað skiptið sem Helgi fer á Evrópumeistaramót öldunga en síðast fór hann árið 1998. „Núna ákvað ég að fara í tilefni af sjötugsafmæli mínu og með okkur konunni komu allar þrjár dætur mínar. Þær voru hið besta stuðningslið og að mínu mati virkustu áhorfendurnir á pöllunum, enda fékk ég alltaf uppklapp fyrir hvert stökk,“ sagði Helgi.

Þó Helgi hafi orðið sjötugur á sínum fyrsta keppnisdegi, keppti hann í flokki 65-69 ára og endaði í 11. sæti af 17 keppendum. Helgi stökk yfir 1,35 m en það er jafn hátt og hjá þeim aðila sem var í 6. sæti en Helgi var þó með færri stig. Ef Helgi hefði keppt í sínum aldursflokki, eða 70 ára og eldri, hefði hann endað í fimmta sæti.

Myndir: Helgi í íþróttagallanum í Gent í Belgíu og skiltið góða sem sýndi hvaða hæð hann fór yfir. Neðst með stuðningsliðinu, Brynju eiginkonu og þremur af fjórum dætrum sínum.