Erla Dögg íþróttmaður UMFN 2004

Erla Dögg Haraldsdóttir var kjörinn Íþróttamaður Njarðvíkur á aðalfundi UMFN í gærkvöldi. Þetta er annað árið í röð sem hún hlýtur þennan titil. Góð mæting var á fundinn en þar lét af störfum sem formaður félagsins eftir 11 ára farsælt starf, Kristbjörn Albertsson.Við starfi hans tók Kristján Pálsson fyrrverandi alþingismaður.

Ár Erlu Daggar í hnotskurn
Erla Dögg Haraldsdóttir er íþróttamaður UMFN 2004. Erla Dögg hefur varla stungið sér til sunds í ár nema að vinna til verðlauna, yfirleitt gullverðlauna. Í ár varð Erla Dögg Íslandsmeistari í 14 einstaklingsgreinum á Íslandsmótum SSÍ. Það afrek er nánast einsdæmi og flokkast sennilega undir en einn Íslandsmeistaratitilinn hennar á þessu ári. Hún vann átta titla í fullorðinsflokki og sex í unglingaflokki, einnig vann hún til fjögurra titla í boðsundum. Í heildina eru því titlar hennar í ár 18.

Erla Dögg ávann sér rétt til keppni á EM 50 í Madrid en stefnumótun SSÍ um aldurstakmörk á alþjóðlegum mótum setti strik í reikninginn. Erla Dögg tók þátt í alþjóðlegu unglingamóti í Lúxemborg með unglingalandsliði SSÍ. Þar vann hún eitt gull, tvenn silfur og eitt brons. Erla Dögg keppti á Evrópumeistaramóti unglinga og var nálægt því að komast í milliriðla. Hún er núna orðin gjaldgeng á fullorðinsmótin og keppti á EM 25 nú í desember þar sem hún setti stúlknamet í einni grein. Erla Dögg var eingöngu 16/100 frá því að ná lágmörkum í 100m bringusundi fyrir Ólympíuleikana í Aþenu en þrátt fyrir það átti hún besta tímann á afrekaskrá SSÍ í 100m bringusundi sl. tímabil. Erla Dögg er mjög fjölhæfur sundmaður og nú á árinu þá hefur hún slegið fimm aldursflokkamet og er alveg við íslandsmetin í þessum greinum. Hún hefur nú þegar slegið öll metin í bringusundi og tvö í fjórsundunum og metin í flugsundunum eru innar seilingar. Erla Dögg tók þátt í tveimur alþjóðlegum mótum með félagsliðinu sínu á árinu. Árangur hennar á þeim mótum var mjög góður, verðlaun á Euro Meet í Lúxemborg og úrslit í Canet í Frakklandi. Á afrekaskrá SSÍ á þessu tímabili þá trónir Erla Dögg á toppnum í hvorki fleiri né færri en átta einstaklingsgreinum. Af þessari upptalningu er ljóst er að Erla Dögg er orðin ein af skærustu íþróttastjörnum Íslands.