Enga uppgjöf að sjá á Grindvíkingum

Karlalið Grindavíkur fór að dæmi kvennaliðsins og vann öruggan sigur í seinni leik Grindavíkurliðanna í dag. Nýliðar Hamars áttu lítið erindi í öflugt lið Grindavíkur sem vann sinn fjórða leik á tímabilinu í Subway-deild karla í körfuknattleik. 

Grindavík - Hamar 100:80

Það var jafnræði með liðunum í upphafi leiks en fljótlega skildu leiðir. Um miðjan fyrsta leikhluta höfðu Hamarsmenn eins stigs forskot (8:9) en þá skelltu Grindvíkingar í lás og Hamarsmenn gerðu einungis þrjú stig það sem eftir lifði leikhlutans. Grindavíkurliðið fór hins vegar á kostum og raðaði niður körfunum, staðan 26:12 þegar fyrsta leikhluta lauk.

Grindvíkingar gáfu Hamarsmönnum ekki tækifæri til að koma til baka eftir að hafa náð góðri forystu. Annar leikhluti var jafn (26:26) og staðan í hálfleik því 52:38.

Sama var uppi á teningnum þriðja leikhluta sem Grindavík vann með einu stigi (23:22) og þeir sigldu sigrinum auðveldlega í land að lokum.

Deandre Kane var afkastamikill og gerði 26 stig auk þess að taka átta fráköst og gefa fjórar stosendingar. Þá var Dedrick Basile með 21 stig, níu fráköst og níu stoðsendingar, Daninn Daniel Mortensen var með sautján stig, sex fráköst og fjórar stoðsendingar.

Þá sagði konan mín við mig: „Ertu eitthvað vangefinn?“

Fyrirliðinn Ólafur Ólafsson skilaði sínu í dag; ellefu stig, þrjú fráköst og þrjár stoðsendingar í hús fyrir Grindavík.

Sigurbjörn Daði Dagbjartsson, fréttamaður Víkurfrétta, ræddi við Ólaf eftir leik en fyrirliðinn var hrærður og sagði tilfinninguna við að finna stuðninginn úr stúkunni hafa verið skrítna, fallega og einlæga.

„Við höfum ekki fast land undir fótum, í eiginlegum og óeiginlegum skilningi,“

– sagði forseti Íslands, Guðni Th. Jóhannesson, sem var mættur á leikina íklæddur gulu og bláu til að sýna stuðning íslensku þjóðarinnar við Grindvíkinga.

Viðtölin við Guðna Th. Jóhannesson, Ólaf Ólafsson og Jóhann Ólafsson, þjálfara Grindvíkinga, í spilunum hér að neðan.