„Ekta úrslitaleikur sem við verðum að vinna“ - segir Logi Gunnars

Logi Gunnarsson leikmaður Njarðvíkinga í körfuknattleik verður í eldlínunni í kvöld þegar Njarðvíkingar mæta KR-ingum í KR-heimilinu kl. 20:00. Logi hefur verið að spila ágætlega í úrslitakeppninni og verið að skora 18 stig að meðaltali í einvíginu gegn KR. Víkurfréttir tóku hann tali fyrir leikinn...

Hvernig leggst leikurinn svo í þig?
„Leikurinn leggst mjög vel í mig enda er þetta ekta úrslitaleikur sem við verðum að vinna. Manni er farið að hlakka til að spila leikinn. Það er rosalega gaman að spila þessa leiki við KR því þetta eru alltaf hörkuleikir þar sem spennan er mikil“.
Hvað gerðist í síðasta leik?
„Eins og ég sagði eftir leikinn þá sýndu þeir einfaldlega meiri hörku en við. Við vildum auðvitað klára þetta en þeir höfðu meiri vilja en við og því fór sem fór. Við náðum að spila ágætlega á köflum í fyrri hálfleik en í seinni hálfleik vorum við að spila eins og aumingjar. Hungrið var ekki til staðar og það má ekki gerast gegn sterku liði eins og KR“.
Verða menn tilbúnir í næsta leik?
„Já, já það er alveg pottþétt og þá verður allt annað upp á teningnum. Við ætlum okkur sigur í þessum leik og komast um leið í úrslitin“.
Hvernig undirbýrðu þig fyrir svona leiki?
„Ég hugsa talsvert um leikinn á leikdag og reyni að einbeyta mér að honum. Maður reynir að forðast að hugsa um eitthvað annað á leikdag en það getur verið nokkuð snúið þar sem ég er í skóla en mér tekst það þó. Ég tek því svo bara rólega og slappa af. Aðal atriðið er þó að vera tilbúinn þegar maður kemur inn í íþróttahúsið“.