Einar Orri áfram Keflvíkingur

Miðjumaðurinn öflugi Einar Orri Einarsson mun leika með Keflvíkingum í 1. deildinni í knattspyrnu næsta sumar. Einar skrifaði undir eins árs samning við félagið í dag, en um tíma var útlit fyrir að hann myndi hugsanlega reyna fyrir sér á nýjum slóðum.

Einar Orri sem er 26 ára hefur alla tíð leikið með Keflvíkingum, sagði í samtali við Fótbolta.net á dögunum að erfiðlega gengi að semja við æskufélagið.

„Ég er með öðruvísi sýn á þetta en stjórnin. Það er stundum þannig í samningaviðræðum þannig að þetta var aðeins sett í frysti. Það er ekkert útilokað að það náist samningar en það er ekkert í gangi núna,“ sagði Einar í síðustu viku. Samningar náðust þó að lokum.

Keflvíkingar undir forystu Þorvaldar Örlygssonar halda því flestum sínum sterkustu mönnum og hafa bætt við við hópinn, m.a. með komu heimamannsins Jónasar Guðna Sævarssonar.