Edwin gerir teikningar af stækkun Húsatóftavallar í 18 holur
Aðalfundur Golfklúbbs Grindavíkur var haldinn 23. febrúar. Edwin Roald Rögnvaldsson, golfvallahönnuður, mætti á fundinn og var með kynningu á þeirri vinnu sem hann hafði unnið fyrir klúbbinn, þ.e.a.s. teikningar af stækkun Húsatóftavallar úr 13 holum í 18 og lagði hann fram 7 tillögur að völlum með hinum ýmsu slaufum. Sú teikning sem félagsmönnum leist einna best á (er tillaga nr. 1) og fylgir hér með fréttinni. Klúbbfélagar vonast til að það verði staðið vel við bakið á þeim í uppbyggingu 18 holu golfvallar.
Breyting á stjórn var óveruleg á aðalfundinum. Guðmundur Valur Sigurðsson dró sig úr stjórn og Páll Erlingsson kom inn í hans stað. Annars er stjórn Golfklúbbs Grindavíkur skipuð þessum aðilum: Gunnar Már Gunnarsson er formaður. Aðrir í stjórn eru: Páll Erlingsson, Eiríkur Benediktsson, Hávarður Gunnarsson, Jósef Ólafsson, Bjarki Guðmundsson og Sigurður Jónsson.
Félagsgjöldin fyrir árið 2007 hækka um 1.000 kr.- á alla aðila nema unglingana og námsmenn. Einnig var ákveðið á fundinum að fella út fjaraðildargjald og í kjölfarið var sagt upp samningi við GKG um 50% gjald á milli klúbba.
Félagsgjöldin eru því eftirfarandi fyrir árið 2007:
• Einstaklingsgjald 36.000 kr.-
• Hjónagjald 54.000 kr.-
• Nýliðagjald 26.000 kr.-
• 67 ára og eldri 16.000 kr.-
• Námsmannagj.(dagskóla) 15.000 kr.-
• 15 ára og yngri FRÍTT
Vallarstjórinn, Guðjón Einarsson, hefur verið endurráðinn. Hann og hans “meðhjálparar” í fyrra skiluðu góðu starfi og vonast klúbbfélagar að völlurinn verði með svipuðu móti eða betri í ár.
Mynd: Teikning Edwins sem klúbbfélögum leist best á.
