Covid-smit greindist í leikmannahópi Grindavíkur
Knattspyrnudeild Grindavíkur var rétt í þessu að senda frá sér tilkynningu þess efnis að leikmaður meistaraflokks karla hjá Grindavík hafi greinst jákvæður fyrir Covid-19 í gærkvöldi.
Allir leikmenn meistaraflokka Grindavíkur hafa verið bólusettir og það sama á við um umræddan leikmann. Hann finnur ekki fyrir einkennum en er kominn í einangrun.
Stjórn og þjálfarar hafa tekið á þessu máli föstum tökum og ætla að kæfa það í fæðingu. Allir leikmenn og starfslið Grindavíkur ífer sýnatöku í dag til að ná tökum á málinu.
Tilkynning knattspyrnudeildar Grindavíkur í heild sinni sem birtist á Facebook-síðu hennar:
„Í gærkvöldi greindist leikmaður hjá meistaraflokki karla hjá Grindavík jákvæður fyrir Covid-19 smiti. Umræddur leikmaður er bólusettur líkt og allir aðrir leikmenn meistaraflokka félagsins. Leikmaðurinn er kominn í einangrun og finnur ekki fyrir einkennum.
Næstu skref voru ákveðin í samráði við smitrakningateymi sem telur ekki þörf á því að neinn úr leikmannahópnum eða starfsliði Grindavíkur þurfi að fara í sóttkví að svo stöddu.
Stjórn félagsins og þjálfarar ákváðu í gærkvöldi að senda alla leikmenn liðsins í sýnatöku í dag til að ná strax utan um umfangið á málinu. Nú þegar hefur meirihluti liðsins og starfslið farið í sýnatöku.
Við vonum að málið fái farsælan endi þegar niðurstöður úr sýnatöku liggja fyrir síðar í dag. Félagið hefur nú þegar gert KSÍ og Grindavíkurbæ viðvart um málið.“
