Brynjar Björn fékk reisupassann eftir leikinn gegn Keflavík

Það er óhætt að segja að Grindvíkingar hafi ekki byrjað tímabilið vel í Lengjudeild karla í knattspyrnu. Grindavík situr í næstneðsta sæti með eitt tap og fimm jafntefli.

Þessi árangur er langt undir væntingum Grindvíkinga og augljóslega þurfti að breyta einhverju. Það varð því úr að skipta út manninum í brúnni og var þjálfaranum, Brynjari Birni Gunnarssyni, sagt upp störfum í gær eftir fjórða jafnteflisleikinn í röð, þá gegn Keflavík.

Haukur Guðberg Gunnarsson, formaður knattspyrnudeildar UMFG, staðfestir uppsögn Brynjars í samtali við Víkurfréttir og segir að leit sé hafin að nýjum þjálfara.