Breyttur leiktími og trommur bannaðar

Leiktíma í leik ÍR-inga og Keflvíkinga í fjórðungsúrslitum Intersport-deildarinnar hefur verið breytt. Átti leikurinn að hefjast á morgun kl. 19:15 en var færður til 20:00 vegna beinnar útsendingar frá leiknum á sjónvarpsstöðinni Sýn.

ÍR-ingar hafa brugðið á það ráð að banna trommur og önnur hávaðasöm tæki í Seljaskóla og því verður trommusveitin góða sem fylgir Keflvíkingum hvert fótmál að bretta upp ermar og láta duglega í sér heyra.

Vegna breytts leiktíma verður sætaferðum á leikinn seinkað og fara rútur frá íþróttahúsinu að Sunnubraut kl. 18:00 til Reykjavíkur. Rútuferðirnar eru í boði Sparisjóðsins og farþegum að kostnaðarlausu.