Brenton körfuknattleiksmaður ársins
Njarðvíkingurinn Brenton Birmingham er körfuknattleiksmaður Íslands árið 2006. Haukakonan Helena Sverrisdóttir var kjörin körfuknattleikskona ársins en það var stjórn Körfuknattleikssambands Íslands sem útnefndi körfuknattleiksfólk ársins.
Eftirfarandi umsögn er af www.kki.is
Brenton Birmingham, hefur leikið mjög vel á árinu 2006. Hann var einn af betri leikmönnum Njarðvíkur sem urðu Íslandsmeistarar síðastliðið vor og var talinn besti leikmaður úrslitakeppninnar. Brenton gaf kost á sér í landsliðið sem tók þátt í Evrópukeppninni sl. sumar og haust, lék frábærlega og var talinn langbesti leikmaður íslenska landsliðsins. Brenton hefur einnig verið að leika vel með Njarðvík í fyrri hluta Íslandsmótsins og einnig lék hann mjög vel með sínum mönnum í Evrópukeppni félagsliða. Brenton hefur verið góð fyrirmynd yngri leikmanna innan sem utan vallar.
Helena Sverrisdóttir hefur undanfarin ár verið að skipa sér á meðal bestu leikmanna í efstu deild kvenna á Íslandi. Helena hefur verið valin körfuknattleikskona ársins sl. 2 tímabil af leikmönnum og þjálfurum 1. deildar kvenna. Á árinu 2006 urðu Haukar Íslandsmeistarar og Poweradebikarmeistarar. Helena lék lykilhlutverk með U-18 ára landsliði sem og A-landsliði sl. sumar og haust. Að auki lék Helena mjög vel með Haukum í Evrópukeppni félagsliða og er talin með efnilegri leikmönnum í Evrópu. Helena er frábær fyrirmynd fyrir allar ungar stúlkur jafnt utan sem innan vallar.
Körfuboltafólk ársins frá árinu 1998:
1998: Helgi Jónas Guðfinnsson og Anna María Sveinsdóttir
1999: Herbert Arnarson og Guðbjörg Norðfjörð
2000: Ólafur Jón Ormsson og Erla Þorsteinsdóttir
2001: Logi Gunnarsson og Kristín Björk Jónsdóttir
2002: Jón Arnór Stefánsson og Birna Valgarðsdóttir
2003: Jón Arnór Stefánsson og Signý Hermannsdóttir
2004: Jón Arnór Stefánsson og Birna Valgarðsdóttir
2005: Jón Arnór Stefánsson og Helena Sverrisdóttir
2006: Brenton Birmingham og Helena Sverrisdóttir
Oftast valin Körfuboltamaður ársins:*
4 Jón Kr. Gíslason (1987, 1989, 1992, 1993)
4 Jón Arnór Stefánsson (2002, 2003, 2004, 2005)
3 Kristinn Jörundsson (1973, 1975, 1977)
2 Jón Sigurðsson (1976, 1978)
2 Valur Ingimundarson (1984, 1988)
2 Guðmundur Bragason (1991, 1996)
2 Anna María Sveinsdóttir (1994, 1998)
2 Birna Valgarðsdóttir (2002, 2004)
2 Helena Sverrisdóttir ( 2005, 2006 )
• Valið hefur verið tvískipt síðan 1998 en frá 1973 til og með 1997 var aðeins valin einn aðili, karl eða kona, en síðan þá hafa verið valin Körfuboltakarl og Körfuboltakona ársins.
www.kki.is
