Boltinn: Keflvíkingar í Garðabæinn í kvöld

Það má búast við spennandi leik á mánudag þegar okkar menn heimsækja lið Stjörnunnar.  Leikurinn fer fram á Stjörnuvelli í Garðabæ og hefst kl. 19:15.  Nýliðar Stjörnunnar hafa staðið sig feykivel í sumar og eru nú í 6. sæti deildarinnar með 23 stig en Keflvíkingar eru einu sæti ofar með 24 stig.  Dómari leiksins verður Jóhannes Valgeirsson, aðstoðardómarar Ólafur Ingvar Guðfinnsson og Smári Stefánsson og eftirlitsmaður KSÍ verður Guðmundur Sigurðsson. 

Á vef Keflavíkur er fróðleg samantekt um einvígi Keflavíkur og Stjörnunnar í gegnum tíðina:??

Keflavík og Stjarnan hafa leikið 9 leiki í efstu deild á árunum, þann fyrsta árið 1994.  Keflavík hefur unnið fjóra leiki en Stjarnan tvo og þrisvar hefur orðið jafntefli.  Markatalan er 14-9 fyrir Keflavík.  Þeir Guðmundur Steinarsson, Haukur Ingi Guðnason og Jóhann Birnir Guðmundsson hafa allir skorað tvö mörk gegn Stjörnunni í efstu deild en Hörður Sveinsson og Sverrir Þór Sverrisson hafa skorað eitt mark hvor.

Liðin hafa leikið 4 leiki í B-deildinni, árin 1992 og 2003.  Keflavík hefur unnið tvo þessara leikja og Stjarnan einn, einum leik lauk með jafntefli.  Markatalan er 8-6 fyrir Keflavík.  Einn leikmaður Keflavíkur hefur skorað í leikjum liðanna í næstefstu deild en það er Magnús Þorsteinsson.

Keflavík og Stjarnan hafa einu sinni mæst í bikarkeppni KSÍ en það var einmitt á síðasta ári.  Þá vann Keflavík 2-1 á heimavelli í 32 liða úrslitum keppninnar.  Magnús Þorsteinsson kom Keflavík yfir og Stjörnumenn skoruðu svo sjálfsmark áður en Ellert Hreinsson minnkaði muninn á lokamínútunni.

Liðin mættust fyrr í sumar í 6. umferð Pepsi-deildarinnar.  Þá varð 1-1 jafntefli á Sparisjóðsvellinum í Keflavík.  Hörður Sveinsson kom Keflavík yfir en Halldór Orri Björnsson jafnaði undir lok leiksins.

Nokkrir leikmenn hafa leikið með bæði Keflavík og Stjörnunni í gegnum árin, m.a. Adolf Sveinsson, Kristinn Guðbrandsson og markmennirnir Bjarki Freyr Guðmundsson og Magnús Þormar.