Blikahrina hjá Bikarmeisturum

Bikarmeistarar Keflavíkur mæta Breiðablik tvívegis á næstu dögum. Fyrri leikur liðanna er í Landsbankadeildinni í kvöld og á sunnudag mætast svo liðin í átta liða úrslitum VISA bikarkeppninnar. Keflavík og Breiðablik skildu jöfn 2-2 á Kópavogsvelli fyrr í sumar og ef Bikarmeistararnir ætla sér að vera með í baráttunni um Íslandsmeistaratitilinn dugir ekkert minna en þrjú stig í kvöld.
Frækinn frammistaða Keflavíkur í undankeppni UEFA keppninnar gæti verið þeim gott veganesti inn í lokasprettinn á íslenska keppnistímabilinu. Keflvíkingar gerðu 4-4 jafntefli við Midtjylland, eitt sterkasta lið Danmerkur en Midtjylland komst áfram á mörkum á útivelli. Verði Keflvíkingar jafn uppveðraðir í leikjunum næstu daga er fátt hér heima sem getur stöðvað þá. Leikur kvöldsins hefst kl. 19:15 á Keflavíkurvelli. Breiðablik situr í 6. sæti deildarinnar með 14 stig en Keflavík hefur 18. stig í 4. sæti. Liðin mætast svo í Kópavogi á sunnudag í VISA bikarnum þar sem Keflvíkingar eiga titil að verja eftir að hafa lagt KR að velli í úrslitum á síðustu leiktíð. Leikurinn í Kópavogi hefst kl. 18:00 sunnudaginn 12. ágúst.
Hallgrímur Jónasson verður ekki með í leiknum í kvöld en hann fékk heilahristing á dögunum í leiknum gegn Midtjylland í Danmörku. Þá verður varnarmaðurinn Branislav Milicevic ekki heldur með þar sem hann tekur út leikbann vegna spjaldasöfnunar en þessir tveir leikmenn hafa verið að leysa stöðu vinstri bakvarðar hjá Keflavík og því fróðlegt að sjá hver muni skila þeirri stöðu í kvöld í fjarveru Branislavs og Hallgríms.