Bláa lónið gerir styrkarsamninga við Suðurnesjaklúbba

Bláa lónið og golfklúbbarnir á Suðurnesjum hafa gert með sér samstarfssamning fyrir árið 2010 og var hann undirritaður af forráðamönnum þessara aðila í Lava sal Bláa lónsins í dag. Heildarvirði samninganna er rúmlega ein milljón króna.

„Við viljum eiga gott samstarf við golfklúbbana og vonum að þessi samningur verði báðum aðilum til hagsbóta. Golfíþróttin er í miklum vexti og við viljum með þessum samningi náð enn betri tengingu við félagsmenn klúbbana á svæðinu sem er næst Bláa lóninu,“ sagði Grímur Sæmundsen, framkvæmdastjóri Bláa lónsins við undirritunina í dag.

Forráðamenn Golfklúbbs Suðurnesja, Sandgerðis, Vatnsleysustrandar og Grindavíkur þökkuðu Grími fyrir þennan góða stuðning sem Bláa lónið sýnir golfíþróttinni á Suðurnesjum og tóku undir með honum um nánara samstarf í framtíðinni.

Mynd: F.v. Páll Erlingsson, formaður Golfklúbbs Grindavíkur, Guðmundur Einarsson, framkvæmdastjóri Golfklúbbs Sandgerðis, Grímur Sæmundsen, framkvæmdastjóri Bláa lónsins, Haukur Hauksson frá Golfklúbbi Vatnsleysustrandar og Páll Ketilsson, varaformaður Golfklúbbs Suðurnesja.