Birkir Már Jónsson Íþróttamaður Keflavíkur 2005

Birkir Már Jónsson, sundmaður, var í gær kjörinn íþróttamaður Keflavíkur árið 2005. Birkir er vel að titlinum kominn, enda hefur hann náð afar góðum árangri upp á síðkastið.

Í ár varð Birkir Már Íslandsmeistari í 6 einstaklingsgreinum á Íslandsmótum SSÍ. Á Íslandsmótinu í 50m laug í 200m skriðsundi og 200m flugsundi og á Íslandsmeistaramótinu í 25m laug í 200m flugsundi, 400m skriðsundi, 200m skriðsundi og 100m flugsundi. Birkir Már vann tvenn bronsverðlaun og ein silfurverðlaun á Smáþjóðaleikunum í Andorra. Hann tók þátt í einu alþjóðlegu móti með félagsliðinu sínu á árinu, þar sem hann stóð sig mjög vel. Hann keppti á danska meistaramótinu með íslenska landsliðinu þar sem hann var við sína bestu tíma. Birkir Már náði lágmörkum á Evrópumeistaramót unglinga í sumar þar sem hann keppti með góðum árangri. Birkir Már hlaut í ár sem og tvö sl. ár styrk frá ÍSÍ úr sjóðnum „Ungir og framúrskarandi efnilegir íþróttamenn“. Á afrekaskrá SSÍ á þessu tímabili trónir Birkir Már á toppnum í sex greinum í fullorðinsflokki.

Birkir Már var að sjálfsögðu einnig sundmaður ársins en aðir sem fengu viðurkenningu voru:

Knattspyrnumaður ársins: Jónas Guðni Sævarsson
Körfuknattleiksmaður ársins: Jón Norðdal Hafsteinsson
Fimleikamaður ársins: Selma Kristín Ólafsdóttir
Badmintonmaður ársins: Ingólfur Ólafsson
Skotmaður ársins: Árni Baldur Pálsson
Taekwondomaður ársins: Ivan Ilievski

Á gamlársdag verða verðlaunin fyrir Íþróttamann Reykjanesbæjar afhent í íþróttamiðstöðinni í Njarðvík. Athöfnin hefst kl. 13 og eru allir bæjarbúar velkomnir.

VF-myndir/Þorgils