Bayreuth tapaði síðasta deildarleiknum

BBC Bayreuth, lið Loga Gunnarsson, tapaði síðasta deildarleiknum í suðurriðli þýsku annarar deildar á laugardag. Bayreuth lék gegn BV TU Chemnitz 99 og urðu lokatölur leiksins 83-90 en leikurinn fór fram á heimavelli Bayreuth.

Logi gerði 30 stig í leiknum á tæpum 32 mínútum. Bayreuth lauk því keppni í 6. sæti deildarinnar með 17 sigra og 13 töp. Ratiopharm Ulm, fyrrum lið Loga, hafnaði í 1. sæti og leikur því í þýsku úrvalsdeildinni að ári.

Logi átti frábært tímabil með Bayreuth í vetur og gerði 18,6 stig að meðaltali í leik og hafnaði því í 15. sæti yfir þá sem voru með hæsta meðalskor á tímabilinu. Logi hafnaði svo í 7. sæti í heildarskorinu en hann gerði alls 553 stig á tímabilinu.