Ari fór holu í höggi í Bergvíkinni

Ari Einarsson í Golfklúbbi Suðurnesja fór holu í höggi á hinni frægu Bergvík, 3. braut á Hólmsvelli í Leiru í vikunni. Ari sló mjög gott högg með 6-járni og boltinn lenti um 2-3 metra frá holu og rúllaði svo ofan í. Eins og flestir vita er Bergvíkin glæsileg golfhola þar sem slá þarf yfir Atlantshafið um 150 metra.

„Þetta var auðvitað frábær tilfinning. Er þetta ekki það sem alla kylfinga dreymir um,“ sagði Ari sem var í móti hjá Oddfellowstúkunni Nirði í Keflavík. Ari var með Stefáni bróður sínum í liði í Texas scramble og þeir toppuðu daginn saman með því að sigra á mótinu.

Ljósmyndina tók Kjartan Már Kjartansson.