Annar sigur gegn Hollandi

Íslenska karlalandsliðið í körfuknattleik vann sinn annan sigur í röð í kvöld gegn Hollendingum, 82-75, eftir framlengdan leik í Groningen í Hollandi. Staðan var jöfn eftir venjulegan leiktíma, 71-71 og sigruðu Íslendingar 11-4 í framlengingunni.

Leikurinn var jafn og spennandi en Hollendingar náðu mest 12 stiga forskoti. Í framlengingunni sigu Íslendingar fram úr og tryggðu sér góðan sigur, 82-75.

„Strákarnir stóðu sig allir vel og var baráttan í liðinu til fyrirmyndar. Dagsskipunin var að vinna báða leikina og það tókst með ágætum. Við keyrðum á 12 leikmönnum í fyrri hálfleik og 11 í seinni og var ánægjulegt að sjá að leikur liðsins er í góðum málum sama hverjir eru inn á leikvellinum,“ sagði Sigurður Ingimundarson, landsliðsþjálfari, í samtali við www.kki.is í kvöld.

Sigurður Þorvaldsson var stigahæstur í íslenska liðinu með 14 stig, næstur honum var Jón Arnór með 13 og Logi Gunnarsson gerði 10 stig.

Íslenska liðið leikur næst gegn Kínverjum í Kína dagana 28. og 30. ágúst í Xian og Harbin.

Heimild: www.kki.is