Ágúst Dearborn biðst afsökunar á framferði sínu

Ágúst Hilmar Dearborn, leikmaður Njarðvíkinga í körfuknattleik, hefur sent frá sér afsökunarbeiðni vegna atviksins sem átti sér stað í leik Njarðvíkur og Hauka í Kjörísbikarkeppninni sl. þriðjudag. Í bréfinu sem birtist á heimasíðu UMFN biður hann Ingvar Guðjónsson, leikmann Hauka og fleiri afsökunar á framferði sínu en Ágúst sparkaði í bakið á Ingvari þegar hann sat á gólfinu.Svona lítur afsökunarbeiðnin út:
“Ég harma þetta athæfi mitt og vill koma til skila sérstakri afsökunarbeiðni til leikmanns Hauka, Ingvars Guðjónssonar sem og annara leikmanna, þjálfara, dómara,stjórnarmanna og áhorfenda. Það sem gerðist er með öllu óafsakanlegt og eitthvað sem gerðist í stundar brjálæði, ég í sjálfu sér veit ekki hvað kom yfir mig en ég skammast mín og þykir þetta ákaflega leitt. Ég varð bæði mér og félaginu til skammar og mun taka út mína refsingu. Ég geri mér grein fyrir alvarleika brotsins, ég hef horft á það aftur og aftur og get ekki skilið sjálfur hvað hefur eiginlega gerst. Eina sem ég er viss um er að mér líður virkilega illa yfir þessu og vildi geta tekið þetta til baka, það eina sem ég get gert úr þessu er að biðja alla sem eiga hlut að máli, afsökunar. Ég hef brugðist sjálfum mér, liðsfélögum,stjórn, félaginu mínu og stuðningsmönnum þess. Undanfarnir dagar hafa verið erfiðir og ætla ég að sjá til þess að slíkt athæfi komi aldrei fyrir á nýjan leik, mönnum verður á og ég ætla mér að læra af þessu. Það er í raun lítið meira sem ég get sagt en það að ég vill enn á ný biðjast afsökunar. Kveðja, Ágúst Hilmar Dearborn.