5 Íslandsmet hjá ÍRB

Sundmenn ÍRB slógu 5 Íslandsmet á innanfélagsmóti í sundmiðstöðinni í Keflavík í gær.

Meyjasveit ÍRB var iðin við kolann og setti 3 met, það fyrsta kom í 4*100 m. fjórsundi þar sem þær stöllur bættu fyrra met um 2,5 sekúndur, næsta met kom í 4*100 m. bringusundi þar sem meyjarnar tóku 6 sekúndur af gamla metinu. Síðasta met sveitarinnar kom í 4*50 m. fjórsundi þar sem bætingin hljóðaði upp á 2/100 hluta úr sekúndu. Meyjasveitina skipuðu þær Jóna Helena Bjarnadóttir, Diljá Heimisdóttir, Soffía Klemenzdóttir og María Halldórsdóttir.

Telpnasveit ÍRB setti met í 4*100 m. flugsundi og bætti sveitin gamla metið um tæpar 2 sekúndur, í sveitinni voru þær Helena Ósk Ívarsdóttir, Íris Guðmundsdóttir, Hafdís Ósk Pétursdóttir og Marín Hrund Jónsdóttir.

Síðast en ekki síst bætti Gunnar Örn Arnarson sveinametið í 400 m. bringusundi um tæpar 13 sekúndur og var það virkilega vel að verki staðið.

Ekki er hægt að segja annað en árangur sundmanna ÍRB hafi verið stórgóður á árinu sem senn er á enda,  því fyrir utan að sigra velflestar liðakeppnir sem í boði voru og setja ógrynnin öll af Íslandsmetum urðu sundmenn ÍRB 70 sinnum Íslandsmeistarar í einstaklings – og boðsundum á árinu. Vonandi verður næsta ár enn betra fyrir sundmenn Suðurnesja.