11 stiga tap hjá Reyni

Sandgerðingar máttu játa sig sigraða í gær gegn Valsmönnum í 1. deildinni í körfuknattleik. Lokatölur leiksins voru 91-80 fyrir Val en leikurinn fór fram í íþróttahúsi Kennaraháskólans.

Valsmenn hófu leikinn af miklum krafti og leiddu í hálfleik 57-35. Sandgerðingar hertu róðurinn í seinni hálfleik og náðu að minnka muninn úr 22 stigum í 13. Staðan að loknum þriðja leikhluta var því 68-55.

Í fjórða leikhluta náðu Sandgerðingar enn að minnka muninn en leiknum lauk með 11 stiga sigri Vals, 91-80.

Sandgerðingar hafa leikið 6 leiki í 1. deildinni, unnið 1 og tapað 5 og eru því í næst neðsta sæti með 2 stig ásamt KFÍ.

Sigurður Gunnarsson var stigahæstur hjá Reyni með 27 stig, næstur honum var Hlynur Jónsson með 20 og Sigurður Sigurbjörnsson gerði 16 stig ásamt því að taka 11 fráköst.

Tölfræði leiksins

Staðan í deildinni