Yngjandi rauðrófuboost

Mér heyrast margir vera taka sig á í mataræðinu svona strax eftir páska og því upplagt að skella inn einni uppskrift að kraftmiklu boosti en þennan nota ég sjálf oft og reglulega. Það er nefnilega svo sniðugt að geta laumað grænmeti í boostana okkar sem við kannski annars hefðum ekki löngun í að borða eitt og sér. Rauðrófusafi er í miklu uppáhaldi hjá mér og mér finnst ómissandi að eiga hann í ísskápnum og fá mér smá heilsuskot í amstri dagsins. Þið þurfið að skella möndlunum í bleyti kvöldinu áður en þá setjið þið þær bara í smá vatn við hliðina á blandaranum og skolið svo af þeim áður en þið skellið í boostið. Fullt af flottum næringarefnum sem hreinsa og næra líkamann og svo eiga rauðrófurnar víst að stuðla að langlífi vegna heilsubætandi eiginleika þeirra. Fyrir þá sem vilja má bæta út í þetta 1 msk chia fræ, goji berjum og jafnvel minnka sítrusávextina og nota þá ávexti sem hentar ykkur. Getið líka notað smá gulrótarsafa á flöskum á móti rauðrófusafanum ef þið eruð að venjast bragðinu af rauðrófunum. Ég kalla þetta boost oft pæjuboostið því það verður svo fallega skærbleikt á litinn! Skál í botn...

1 glas rauðrófusafi lífrænn úr flösku
1 hnefi frosnir mangóbitar
1 appelsína í bitum
1 sítróna (bara safinn)
10 stk möndlur
(setja möndlur í bleyti kvöldinu áður)
vatn ca 150 ml, meira ef þörf
1 msk lífrænt hreint mysuprótein ef vill aukalega
½ grænt epli
1 tsk kanill


Heilsukveðja, Ásdís grasalæknir.
www.facebook.com/grasalaeknir.is
www.pinterest.is/grasalaeknir