Tahini sesamsmjör – eintóm hollusta

Það eru allmörg ár síðan ég uppgötvaði það að borða tahini og ég man að sumir ráku upp stór augu þegar ég sagði þeim hvað þetta væri. En nú er tíðin önnur og margir farnir að kannast betur við ýmsan heilsumat og fólk duglegra að prófa sig áfram með nýjar tegundir. Tahini er í raun maukuð sesamfræ sem verða að einskonar sesamsmjöri (svipað og hnetusmjör) sem hægt er að nota sem álegg ofan á hrökkbrauð eða brauðmeti; í salatdressingar; út í boosta eða út á morgungrautinn, svo er tahini yfirleitt notað þegar búin er til hummus. Á mínu heimili er vinsælt hjá yngri kynslóðinni að smyrja tahini ofan á eplabita eða bananabita og narta í sem millimál eða smyrja ofan á hrískökur ásamt gúrkum. Það er hægt að kaupa bæði ljóst og dökkt tahini en þetta ljósa notar maður yfirleitt í hummus og það dökka (búið að rista sesamfræin) sem álegg. Tahini er sneisafullt af næringarefnum og ef borið saman við hnetusmjör þá inniheldur það töluvert meiri trefjar, minna magn kolvetna og minna af mettaðri fitu. Tahini inniheldur m.a. fullt af B-vítamínum, omega 3 fitusýrur,  ríkulegt magn af kalki og magnesíum, sínki, fólínsýru, o.fl. Læt fylgja eins og oft áður eina góða uppskrift að smá heilsunammi úr tahini til að koma ykkur á bragðið með að byrja nota tahini!

Súkkulaði halva:

1 dl kakóduft
1 dl kókósolía
½ dl agavesíróp
2½ dl tahini
1 tsk vanilluduft


Láta kókosolíu verða fljótandi með því að standa í heitu vatni

Allt sett í blandara eða matvinnsluvél, setja því næst í konfektform eða klakabox og í kæli eða frysti í a.m.k. ½ klst.


Heilsukveðja, Ásdís grasalæknir.
www.facebook.com/grasalaeknir.is
www.pinterest.com/grasalaeknir